Vi har eige produksjonslokal godkjend av Mattilsynet, som gjer at vi kan handtere kjøtet på garden etter slakt. Vi har eit eige rom knytt til anlegget som er særskilt bygd for tørrmodning, der deler av dyret (heile ryggstykker: entrecote- og stofrekam) kan ligge i lang tid i nøyaktig kontrollert atmosfære med tanke på fukt og temperatur, med UV-lys som hindrer uønska mikrobiell vekst.  Vi kan då tørrmodne kjøtet i lang tid (2 – 3 månader), avhengig av alder på dyret og marmorering av kjøtet. Langtids tørrmodna kjøt har ein heilt særprega smak med kraftigare innslag av umami, nøtteaktig smak frå fettet, er svært saftig og gir ein unik måltidsoppleving.

God modning (mørning) av kjøtet er avgjerande for eit godt resultat, uavhengig av om det er våt- eller tørrmodning som vert nytta. Modning er ein komplisert prosess. Kort fortalt har musklane ulike enzym som er sentrale i oppbygging og reparering av muskelfibre. Etter døden byrjar desse enzyma å bryte ned muskelstrukturen og bindevevet som ligg rundt muskelfibrane. Dette må skje under lave temperaturer (-1 – +3 grader) for å unngå at det vert vekst av bakterier som vil øydelegge kjøtet. Difor tek prosessen lang tid. For meir inngåande informasjon sjå her

Viktig for eit godt og mørt resultat er det og at dyret ikkje vert stressa før slakting. Vi er heldige som ligg berre 20 min køyring frå slakteriet i Førde. Dette gjev kort transporttid og lite stress for dyra. Vi passer og på å alltid sende fleire dyr samstundes, slik at dei er saman med dyr dei kjenner.

Før dyra vert sende til slakt, vert dei merka i øyre med eit eige «nisjeslaktmerke». Etter slakting vert skrotten stempla med eit tilsvarande merke, noko som sikrar at vi får attende det dyret som vi sende til slakt. Ideelt sett skulle vi ha slakta dyra sjølve, men dette er med dagens regelverk ikkje praktisk eller økonomisk mogleg. Vi har heldigvis eit godt samarbeid med Nortura Førde, og er verkeleg nøgde med jobben dei gjer der!

Etter slakt heng skrotten på kjølelager kring +3 grader i 1-2 veker . Vi skjærer så ned skrotten i eige lokal. Biffane og grytekjøtet vert vakuumpakka og ligg til vidare modning i ytterlegare 2-3 veker (våtmodning).  Totalt får kjøtet kring 100 døgngrader for optimal mørning. Kjøtdeigen vert nedfrosen med ein gong etter nedskjering, for å ikkje misse bindeevna si.